سعيدة مبارك

من Beidipedia
اذهب إلى التنقل اذهب إلى البحث
1Silhouette Female.svg

سعيدة مبارك (--19 - 2019) لو تابعنا أفلام الإبيض و الإسود المصرية حا نلاقى شخصيات الأفلام فى مقابلاتهم لبعض واحد بيقول للتانى : سعيدة , و التانى بيرد عليه بـ: سعيدة مبارك . و ده كان حال الشارع المصرى فى الوقت ده و لغاية النهاردة ؛ ما حدش عارف حقيقة حكاية سعيدة مبارك دى تطلع إيه ؟!! و الحكاية ببساطة إنه كان فيه واحدة كان إسمها سعيدة و كانت عاملة عاملة مهببة و منيلة بستين نيلة و سيرتها كانت على كل لسان ؛ يعنى كل واحد بدل ما كان بيحيى التانى بتحية اللقاء ؛ كان يقصد يقوله: شوفت سعيدة عملت إيه ؟ و الرد كان: سعيدة مبارك و مبارك ده إللى هو أبو سعيدة , يعنى كان عاوز يقول له: أيوة عارف إللى عملته سعيدة ؛ إللى هى بنت مبارك . يعنى ما كانش ينفع الرد يكون: سعيدة عبحفيظ و لا سعيدة الشهبورى و لا سعيدة فتاكات ؛ لأن سعيد مبارك ذات نفسها هى إللى كانت معنية بالشرشحة .

كان وقتها ممكن إستبدال حكاية سعيدة و سعيدة مبارك بأسامى ناس تانية ؛ لو كانت عملتهم أسخم من عملة سعيدة مبارك ؛ يعنى لو كان فيه واحد إسمه حنكور المفش ؛ و كان عمل جناية أو جريمة أو فعل مشين زلزل الشارع المصرى ؛ كان المصريين وقتها شرشحوه , و كل واحد يقابل التانى يقول له: حنكور و التانى يرد عليه بـ: حنكور المِفَشْ . لكن بعد عصر البترودولار و هبوب رياح الوهابية الجنوبية الشمالية الغربية ؛ نزلت علينا الفتاوى من علماء التقوى و الورع و الفضيلة بحرمانية شرشحة سعيدة مبارك و أمثالها زى حنكور المفش و قالوا بلاش نجيب فى سيرة الناس و نشرشحهم بالطريقة دى , و ضرورى نحيى بعض بتحية يتفق عليها و نردم بيها الشارع المصرى ؛ يعنى إللى يقابل واحد يقول له: سماعليكو و التانى يرد عليه بـ: سماحتوبركاتو , و النهاردة ماتت حكاية سعيدة و إندفنت معاها و إختفت الكلمة من لسان الناس و إرتاح أبو سعيدة مبارك فى تربته و عيشنا فى زمن سماعليكو , و سماحتوبركاتو و إللى فات مات و أذكروا محاسن موتاكم و إفتكروا أى حسنة لسعيدة و لأبوها مبارك .

مصدر[عدل]

  • أيمن غالى , سعيدة مبارك و حنكور المفش