طرشي

من Beidipedia
(بالتحويل من مخلل)
اذهب إلى التنقل اذهب إلى البحث
Polish style pickled cucumbers IMGP0529.jpg

المخللات جمع مخلل و باللهجة القاهرية إسمه طرشى , و المقصود بالطرشى بعض أنواع الخضروات المحفوظة عن طريق غمرها فى ماء و ملح لعدة أيام لحفظها بعد تغيير بعض صفاتها و ملامحها و طعمها, أما كلمة المخلل فهى كلمة أعم و أشمل لأنها لا تشمل بعض أنواع الخضروات فقط زى الطرشى ؛ لكن كمان أى حاجة عايز تحفظها و كله بالملح , و المخلل من كلمة خَلِّيه يعنى إبقيه زى ما هو أو إِبقيه على ما هو عليه . ما حدش عارف تاريخ المخللات فى العالم, و أعتقد إنها إختراع و إبتكار مصرى 100%, و ده واضح و ظاهر كويس جدا فى مجال مخللات المصريين عبر التاريخ و لغاية النهاردة .

بدأت الحكاية لما بَعت واحد من الفلاحين البخلاء إبنه بعشر خيارات حسب عدد أفراد أسرته , كل واحد خياراية .الواد كان لِعَبى ؛ ماشى يبص يمين و شمال ؛ ما أخدش باله من طوبة كانت فى سكته ؛ الواد إتكعبل ؛ و هوبا نزل على بوزه زرع بصل , و قُفة الخيار طارت فى الهوا و إتبعزق إللى فيها .الواد قام مذعور؛ ماهمهوش الجروح اللى علّمِت فى جِتتُه؛ لكن كان كل تفكيره فى العشر خيارات .الأب كان معلم إبنه إنه أعطى له خيارات بعدد أصابع يديه ؛ يعنى كل صوباع كان مقابله ثمرة خيار .الولد قام يِدَوَّر على الخيار, و المصيبة إنه إكتشف ضياع واحده منهم, و من خوفه من أبوه فكر إنه يقطع لنفسه صوباع علشان يستقيم كلام أبوه له مع عدد الخيارات, و لكن لقى إن الأسهل إنه يقول له إنه أكل الخيارة بتاعته .

ولأن الولد كان حا يموت و ياكل خيار قعد يدَوَّر كل يوم و التانى على الخيارة المفقودة فى نفس مكان الوقعة إياها, و ما فقدش الامل فى إنه يلاقيها . و أخيرا بعد شهر؛ لقى الخيارة واقعة فى بركة مَاية؛ لونها إتغير شوية لكن شكلها و حجمها زى ما هو, أكل منها؛ طعمها مالح لكن لطيف ؛ بَص فى البركة؛ لَقَى على حروفها ملح, و الماية طعمها مالح؛ رجع البيت و جاب أنواع تانية من الخضار و سابها فى بركة الماية و رجع بعد أيام و لَقَى نفس النتيجة؛ فعجبته الفكرة, و خَلِّل كل حاجة وقعت تحت إيديه؛ حتى أبوه البخيل لما مات خَلِّلُه و عمله مِخَلِل, و ده إللى العالم كله سماه تحنيط .

بقى لَمَّا تِخَلِّل بنى إدم يبقى إسمه تحنيط, ولَمَّا تِخَلِّل سمك يبقى إسمه فسيخ , ولَمَّا تِخَلِّل لحمة يبقى إسمها بسطرمة و هكذا, و من يومها و المصريين هم أعظم مِخَلِلَيلاتية فى الدنيا , ما سابوش أى حاجة إلا و خَلِلُوها .الجديد بقى يا حضرات ؛ إنك ممكن تِخَلِّل بنى آدم صاحى , و هو مِتخلل يكلمك و تكلمه , و ياكل , و يشرب , و يعمل بيبيى زى البنى آدمين العاديين بالظبط .

زمان كان ممكن تِخلل بنى آدم ميت , و جثتة تعيش آلاف السنين, لكن البنى آدم الحى تخليله أقل بكتير, و المصريين وصلوا لغاية دلوقتى لأكتر من تلاتين سنة تخليل , والموضوع لأنه مُكلف جدا فهو حتى الآن قاصر على فئة معينه من البنى آدمين المصريين, و بقى تلاقى عندنا , فقط فى مصر , مدير مِخَلِّل, و رئيس مجلس إدارة مِخَلِّل, و وزير مِخَلِّل, وأخيرا رئيس جمهورية مِخَلِّل .و ربنا يخليكم و تخللوا أكتر وأكتر.

تخليل البنى آدمين صاحيين شعوب أخرى نقلت عن المصريين إكتشافهم و أبدعت فيه فى منطقة الشرق الأوسط, زى مخلل ليبيا السابق معمر القذافي ( 42 سنة تخليل ), و مخلل سوريا السابق حافظ الأسد ( 29 سنة تخليل ) و مخلل اليمن السابق علي عبدالله صالح ( 36 سنة تخليل ), و إنتقلت الفكرة عبر البحار و شوفنا مخلل كوبا السابق فيدل كاسترو ( 49 سنة تخليل ) و غيرهم, و طبعا فى مصر منبع المخللات و رئيسها السابق مبارك ( 30 سنة تخليل ) . و بخصوص تخليل الملوك؛ حدث و لا حرج و ما فيش داعى نذكر تواريخ و مدد تخلليلهم منعاً للحسد .

فى فترة حكم الرئيس السابق حسنى مبارك ؛ الوزرا فى مصر تعدوا العشرين سنة تخليل ..زى آمال عثمان, و ماهر أباظة, و كمال الشاذلى, و كثيرين و آخرهم فاروق حسنى . و كل المخللات السابقة يا ماتوا يا بقوا خارج السلطة ؛ يعنى مدة صلاحيه تخليلهم خلاص باظت . و إن كان مجال تخليل بعض الشخصيات فى مناصبها ما زال قائما و معمول بيه فى مصر صانعة المخللات و صاحبة إبتكار و إكتشاف أصول علم المخللات فى العالم .و طبعا ما نقدرش ننكر أو نضيَّع تعب تخليل الوزراء عند شعوب أخرى؛ زى وزير دفاع كمبوديا الجنرال" تيا بانه " إللى بيشغل منصبه منذ عام 1979 وحتى الآن؛ تخيلوا !! .و عاشت المخللات فوق رؤوس شعوبها مستقرة .

مصدر[عدل]

  • أيمن غالي


Seafood Arabic style.jpg
المطبخ العربي
شيخ محشي | خميعة | سيارة مفخخة | الدولمة | فودكا البركة | الباذنجان | طبق بوخنونة | القات | بابا غنوج | منسف | ماكدونالدز | ملوخية | طرشي | كشري