طرمخة

الطرمخة فى العامية المصرية تحمل معانى مثل : اخفى فضيحة , تستر على فضيحة , تجاهل عمداً امراً شائناً، والكلمة محرفة عن كلمة اللغة الإنجليزية «Tarmac» والموجودة فى بعض اللغات الأوروبية، ومعناها: رصف الطرق . النهارده يا جماعة هنتكلم عن خلق جديد من أخلاق الأنبياء والمرسلين ، كل الشخصيات العظيمة في التاريخ ، وفي علم النفس ، خلق , كل الناس المتفوقة في دراستها ، المتفوقة في حياتها ، في بيتها، مع الزوج الجميل الطيب ، مع الزوجة الرائعة الطيبة ، مع الأولاد الصغيرين الحلوين ، خلق , لازم تتحلى بيه، لازم يا جماعة، ما يفوتكش ، بجد ، إذا كنت عايز تعمل حاجة في حياتك ، لازم تتحلى بالخلق ده، إذا كنت عايز ربنا يديك حسنات ، لازم يبقى عندك الخلق دهون ، عايز تبقى راقي ، اسمع مني، عايز تبقى متميز وكل الناس يحسدوك، ويبصولك كده على إنك يعني، ها.. ها؟

النهارده يا جماعة، هنتكلم عن خلق الطرمخة.... الله.... شوف الكلمة وقعها على النفس جميل ازاي ، الفطرة الإنسانية يا جماعة، دي الفطرة.. اللي هي جمعها فطائر ,شوف أد إيه لذيذة , الطرمخة. بعض الناس يقولك الساكت عن الحق شيطان أخرس.. يااااه اوعوا تصدقوا الكلام ده يا شباب ، أبدا، معاذ الله ، الساكت عن الحق جدع ، الساكت عن الحق 3 حاجات ، (جدع.. ورجل.. وجدع). 3 حاجات نقولهم تاني: الطرمخة أو السكوت 3 حاجات: إيه هما؟ جدع.. ورجل.. ورجل جدع... تخيل؟ الساكت عن الحق رجل ، تعرف تبقى رجل ؟ تقدر تبقى رجل ؟ عندك الشجاعة والإقدام إنك تبقى رجل ، ساكت عن الحق ، مطرمخ ، عندك استعداد تعمل النقلة دي في حياتك ، تتحول من متظاهر أو مناضل أو مطالب بحقوق الفقراء وكل الحاجات الوحشة دي إلى رجل شجاع لا يخشى إلا الحاكم وأمين الشرطة على ركنة عربيته.

تخيل ، لو شفت الحق وسكت عنه... متخيل؟ اللي يقولك بقى جبان مسكين... سيبك منه.. مش فاهم، عقله صغير، اللي يشوف الحق ويسكت، ويخبي، ويكتم في قلبه يا شباب، وما يتكلمش، يبقى أشجع الشجعان، وأعقل العقلان، وأرجل الرجلان، الحق اللي يودي الناس السجن يا شباب , ما يبقاش حق، يبقى مصيبة، الحق اللي يوديك النيابة.... ما يبقاش حق، يبقى عربية البوكس اللي مستنياك تحت البيت، اللي يشوف عربية البوكس ويستخبى، يبقى رجل طبعا يا شباب، طبعا يبقى رجل، وأرجل الرجلان، أنا مسؤول... أرجل الرجالة، وأشجعهم .

قال الرسول محمد صلى الله عليه وسلم: من كان يؤمن بالله واليوم الآخر فليقل خيرا أو ليصمت ، حديث صحيح يا شباب ، معناه إيه، معناه إن الخير زي الصمت بالضبط، والصمت زي الخير، تخيل، تخيل، يقل خيرا، يعني يقول خيرا، يعني يقول خير يا جماعة فيه إيه، يسأل يا شباب، يسأل... عشان مش فاهم، فيه إيه؟ محدش جاوبه، أو الدنيا غيمت والبوليس جه، والجو بقى لبش، يصمت فورا، فورا يا شباب، البنات اللي معانا، فليقل خيرا، أو أو إيه. ليصمت..تخيل؟. يصمت. النبي اللي بيقول، اسكت , اسكت خالص.

الإيمان هو: خيرا، أو هسسسسسس ولا كلمة , طرمخ، ده النبي اللي بيقولك مش أنا... فيه ناس يا جماعة غاوية مشاكل ينزل من البيت يلاقي عربيته اتسرقت , ابتلاء من الله عز وجل , عايز يختبر إيمانك , عايز يشوفك جدع كده وماسك نفسك ولا أي كلام وخرع اثبت كده خليك رجل هتعمل إيه تجري تبلغ البوليس البوليس هيعمل إيه ولا ايه يا جماعة البوليس مسكين عنده مصايب الدنيا يا اخوانا ليه ما نصبرش ونحتسب ليه ما ندعيش للحرامي عمرك جربت تدعي للحرامي اللي سرقك عمرك حاولت تتعايش مع فكرة السرقة ليه لأ يا شباب جربوا تدعي للحرامي أيوه أيوه أقسم بالله تدعي إن ربنا يكرمه ويقدر يفكك العربية ويبيعها ويستفيد بتمنها مش جايز محتاج عليه أقساط عربية ولا حاجة، مش جايز مريض أمه عيانه عندها النقرص ولا كتافها واجعاها مش جايز ولاده محرومين، مش جايز مش لاقيين لانش بوكس يحطوا فيه سندوتشات الجبنة الرومي وهما رايحين المدرسة ايه القسوة دي ليه كده ايه اللي حصل لأخلاقنا يا جماعة ايه اللي حصل للمجتمع .... المجتمع لازم يتغير يا جماعة اوعوا تفتكروا يا شباب ان الحياة اللي احنا عايشينها الحكام هما اللي مسئولين عنها أو الشرطة أو الجيش أو الوزراء لا لا يا جماعة احنا مين اللي بيرمي قشر الموز في الشارع الحاكم؟!!! الحاكم بياكل الموز بقشره يا شباب احنا يا اخوانا يا اخوانا يا اخوانا الناس هما السبب والله العظيم ربنا بيبتلينا بأعمالنا لأننا وحشين . احنا وحشين يا جماعة، عشان كده مش هنتقدم، شفت الأوروبيين بيعملوا ايه؟ شفت بيعملوا ايه .

عارف لو انت بتصلي قيام الليل وملتزم بذكر الله وبالأوراد وما بتطلبش ساكت زي الانبيا ما قالوا وزي ما ولي الأمر ما بيقول والقرآن والسنة وحكايات الولد الشقي بتاعة محمود السعدني والأسد الملك وتيمون وبومبا عارف هاتبقى شاطر وربنا هيديك حقك تخيل هو ده الكلام يا شباب وبعدين احنا بنتخانق على ايه بنضيع وقتنا في ايه السياسة والكلام الفارغ مظاهرات وهتافات وواحد امبارح كاتب مقالة يقولك الفقراء لا يجدون الخبز اتقوا الله يا جماعة اتقوا الله بقى الخبز في الفرن، اقسم بالله العظيم شايفه بعيني، كفاية بقى كفاية كذب بقى كفاية مطالبات نعمل حاجة بقى نسكت بقى ونعمل حاجة نحس بال البلد بقى البلد بتخرب البلد بقت دوشة وزحمة والطريق الدائري طول اليوم مقفول ومحور ميدان لبنان بيقعد ساعة على ما يعدي موتوسيكل كل ده عشان نتق الله ربنا عايزك عايز يجيبك عايز يجيبك فبيوديك المحور عشان ما توصلش بيحبك .

عايز أقولكم كل ده من تقصيرنا يا جماعة صلوا يا اخوانا أعينوني على أنفسكم بالسجود والسكوت تسجد وتسكت الركوع والسكوت تركع وتسكت القيام والسكوت تقوم وتسكت الصيام والسكوت تصوم وتسكت الزكاة والسكوت تزكي وتسكت الكلام والسكوت تتكلم وتسكت في نفس الوقت والطرمخة يا شباب الطرمخة أوصيكم ونفسي بتقوى الله والطرمخة الطرمخة منجاة يا شباب مسئولية، عشان التعايش والخير والسعادة والأخلاق والعبادات وأسماء الله الحسنى وعمرو خالد دوت نت كل ده من نتائج الطرمخة وأثرها الطيب على العبد الصالح إني داع فأمنوا: اللهم إنا جئناك ساكتين جئناك موافقين جئناك مطرمخين جئناك معرضين، جئناك مستهدفين يا حنان يا منان يا حنان يا منان يا حنان يا منان يا حنان يا منان يا حنان يا منان.. أقم الصلاة .